Habarlar
Aragatnaşyk pudagynda zähmet çeken Watan gahrymanlaryny hormatlamak çäresi guraldy
Beýik Watançylyk urşunda gazanylan Ýeňiş gününiň öňüsyrasynda Watan gahrymanlaryna Döwlet Baştutanymyzyň adyndan pul sylaglary, gymmat bahaly sowgatlar we gül desseleri gowşurylýar. Ýurdumyzda geçirilýän çäreleriň çäklerinde, her ýyl Türkmenistanyň Aragatnaşyk ministrligi we ministrligiň edara-kärhanalary tarapyndan aragatnaşyk pudagynda zähmet çeken Watan gahrymanlaryny hormatlamak çäresi guralýar.Şu ýyl «Türkmenpoçta» PAK-da uzak ýyllaryň dowamynda zähmet çeken Watan gahrymany Walentina Žerdewa 103 ýaşaýar. Walentina Žerdewa gaýduwsyz esgerlerimiz bilen deň söweşen, şöhratly söweş ýollaryny geçen we Beýik Watançylyk urşunyň köp sanly baýraklaryna, alkyş hormata mynasyp bolan zenanlaryň biridir. Aragatnaşyk pudagynyň wekilleri Ýeňiş güni mynasybetli Watan gahrymanynyň öýüne baryp, baýramçylyk sowgatlaryny we ter gül desselerini gowşuryp, nesilleriň hormatyna mynasyp bolan merdana zenana edermenligi we gahrymançylygy üçin hoşallyk sözlerini aýtdylar. Walentina Žerdewa öz gezeginde ýurdumyzyň parahatçylygyna, asudalygyna, gülläp ösüşine buýsanç bildirip, Döwlet Baştutanymyzyň Watan gahrymanlaryna, merdanalyk mekdebine öwrülen ýaşuly neslimize goýýan belent hormat-sarpasy, döwlet derejesindäki aladalary üçin ýürek arzuwlaryny we alkyş sözlerini beýan etdi.
Täjigistan we Türkmenistan ulag we kommunikasiýalar ulgamyndaky hyzmatdaşlygy maslahatlaşdylar
Täjigistan Respublikasynyň Türkmenistandaky ilçisi Wafo Niýatbekzoda Türkmenistanyň Ministrler Kabinetiniň Başlygynyň orunbasary Batyr Annaýew bilen duşuşyk geçirdi. Bu barada Täjigistanyň Aşgabatdaky ilçihanasy habar berdi.Taraplar ulag we ýük daşamalary ulgamyndaky ikitaraplaýyn hyzmatdaşlygyň häzirki ýagdaýyny hem-de geljegini maslahatlaşdylar. Şeýle-de, kommunikasiýa pudagyndaky özara gatnaşyklaryň meselelerine seredildi.Habarda bellenilişi ýaly, duşuşyk dostlukly we özara düşünişmek ýagdaýynda geçdi.
Türkmenistanyň wekilleri «SusHi Tech Tokyo 2026» forumynyň çäklerinde hyzmatdaşlyk gepleşiklerini geçirdiler
Türkmenistanyň Aragatnaşyk ministrliginiň wekilleri 27 — 29-njy aprel aralygynda Tokio şäherinde geçirilen «SusHi Tech Tokyo 2026» halkara innowasion forumyna gatnaşdy. Bu barada Türkmenistanyň DIM-niň resmi saýtynda habar berildi.Habarda bellenilişi ýaly, innowasion foruma dünýäniň dürli ýurtlaryndan kompaniýalar, startaplar we tehnologiýa hünärmenleri gatnaşdylar. Forumuň esasy maksady — täze tehnologiýalary, innowasiýalary we sanly çözgütleri görkezmek hem-de halkara hyzmatdaşlygy ösdürmekden ybarat boldy.Forumyň dowamynda emeli aň (AI), 5G/6G aragatnaşyk ulgamlary, «akylly» şäherler (smart city), ýaşyl energiýa we sanly ykdysadyýet ýaly möhüm ugurlar boýunça çykyşlar we sergiler geçirildi. Gatnaşyjylar täze önümler bilen tanyşmaga, tejribe alyşmaga we hyzmatdaşlyk mümkinçiliklerini ara alyp maslahatlaşmaga mümkinçilik aldylar.Forumyň çäklerinde türkmen wekiliýeti tehnologiýa we sanly ösüş ugurlarynda öňdebaryjy birnäçe daşary ýurt kompaniýalarynyň wekilleri bilen iş duşuşyklaryny we gepleşikleri geçirdi. Duşuşyklarda sanly infrastruktura we telekommunikasiýa hyzmatdaşlygy ýola goýmak, emeli aň (AI) we sanly hyzmatlar, «Akylly şäher» çözgütleri (Smart City) — şäher dolandyryşy, Startap ekosistemasy — halkara startap platformalary we tehnologiýa merkezleri bilen ýaş startaplary ösdürmegiň hem-de gelejekde bilelikdäki taslamalary amala aşyrmagyň mümkinçilikleri ara alnyp maslahatlaşyldy.
Aşgabatda Hytaýyň öňdebaryjy tehnologiýa kompaniýalary bilen gepleşikler geçirildi
Türkmenistanyň Aragatnaşyk ministrligi tehnologiýalar we telekommunikasiýa pudagynda işleýän Hytaýyň öňdebaryjy kompaniýalarynyň wekilleri bilen birnäçe duşuşyk geçirdi. Gepleşiklere Türkmenistanyň Ministrler Kabinetiniň Başlygynyň orunbasary Batyr Annaýew hem-de ýurduň Aragatnaşyk ministri Hajymyrat Hudaýgulyýew gatnaşdy.Duşuşyklaryň dowamynda Türkmenistan bilen Hytaýyň ýokary tehnologiýalar ulgamyndaky hyzmatdaşlygyny giňeltmegiň mümkinçilikleri ara alnyp maslahatlaşyldy. Taraplar bilelikdäki taslamalary durmuşa geçirmek, şol sanda emeli aň boýunça ylmy-barlag merkezlerini döretmek, «zatlaryň interneti» çözgütlerini we «akylly şäherler» konsepsiýasyny ornaşdyrmak, şeýle hem neýrotorlar we kwant tehnologiýalaryny ösdürmek meselelerine garadylar.Ministr Hudaýgulyýew emeli aňyň Türkmenistan üçin infrastruktura derejesinde strategiki ileri tutulýan ugur bolup durýandygyny belläp geçdi. Onuň sözlerine görä, ol döwlet dolandyryşynyň netijeliligini ýokarlandyrmagyň, şeýle hem lukmançylyk, bilim we ykdysadyýetiň beýleki pudaklaryny ösdürmegiň möhüm guraly hökmünde garalýar. Onuň bellemegine görä, Hytaýyň öňdebaryjy tejribesi bilen Türkmenistanyň strategiki ösüş ugurlarynyň utgaşmagy hyzmatdaşlyk üçin giň mümkinçilikleri döredýär.Gepleşiklere «Huawei Technologies Co., LTD», «FE ZTE INVESTMENT LLC», «Shanghai DTSpace Futech Auto Tech Co.», «Xinjiang Poplar Cable Manufacturing Co., Ltd.» hem-de «China Information and Communication Technologies Group Corporation» kompaniýalarynyň wekilleri gatnaşdy.
Aşgabatdaky forumda Türkmenistanyň Aragatnaşyk ministrligi sanly strategiýasyny hödürledi
Türkmenistanyň aragatnaşyk ministri Hajymyrat Hudaýgulyýewiň Aşgabatda geçirilen Türkmen-hytaý işewürler forumyndaky çykyşy işewürlik maksatnamasynyň çäklerinde beýan edilen esasy konseptual beýanatlaryň birine öwrüldi. Pudagyň ýolbaşçysy emeli aňdan başlap, kwant hasaplamalaryna çenli bolan tehnologiýalaryň diňe bir gural däl-de, eýsem täze ykdysady hakykatyň binýadyna öwrülýän ösüşiniň uly göwrümli nusgasyny hödürledi.Aragatnaşyk ministrligi üçin emeli aň şu günki günde — bu möhüm infrastruktura derejesindäki ugra öwrüldi. Ministriň nygtaýşy ýaly, neýroulgamlara esaslanýan çözgütleriň ornaşdyrylmagy edaranyň dolandyryşyň täze, ýokary hil derejesine çykmagyna mümkinçilik berýär. Bu ýerde aragatnaşyk torlaryndaky agramlylygy optimallaşdyrmakdan başlap, raýatlaryň ýüzlenmelerini akylly ulgam arkaly tertipleşdirmäge çenli — maglumatlaryň hakyky wagt tertibinde düýpli seljerilmegi barada gürrüň gidýär. Şeýle çemeleşme “raýat — döwlet” özara gatnaşygynyň nusgasyny düýbünden üýtgedip, hyzmatlary mümkin gatyşyk şahsy we elýeterli edýär.Ministrligiň strategiýasy ýurduň uzak möhletleýin geljekdäki bäsdeşlige ukyplylygyny kesgitleýän öňdebaryjy tehnologiýalaryň ähli ugruny öz içine alýar.Kwant tehnologiýalary: Türkmenistan geljegiň iň çylşyrymly meselelerini çözmek üçin aşa ýokary hasaplama ukyplaryny ornaşdyrmagy strategik maksat edip goýýar.Zatlaryň interneti (IoT): Gurallaryň özara baglylygynyň ýaşaýyş hilini we energiýa netijeliligini göni ýokarlandyrýan «akylly şäher», «akylly senagat» we «akylly durmuş» konsepsiýalarynyň giň gerimli durmuşa geçirilmegi.Uly maglumatlar (Big Data): Ykdysadyýeti takyk çaklap we milli howpsuzlygy berkitmek üçin esas bolup hyzmat edýän maglumatlary saklamagyň we seljermegiň döwrebap ulgamlarynyň döredilmegi.Bulut platformalary: Döwlet, işewürlik we jemgyýetiň arasynda ygtybarly gatnaşyklary üpjün etmek üçin ýokary tizlikli interfeýsleriň işjeň ornaşdyrylmagy.Hasabatda Hytaý Halk Respublikasy bilen hyzmatdaşlyga aýratyn orun berildi. Hytaýyň ägirt uly innowasion tejribesiniň we Türkmenistanyň anyk strategik maksatlarynyň birleşmegi emeli aň we neýroulgam tehnologiýalary babatynda bilelikdäki ylmy-barlag merkezlerini döretmäge ýol açýar.«Hyzmatdaşlyk, ynam, ösüş — bu diňe bir şygar däl-de, eýsem biziň hereketlerimiziň meýilnamasydyr» diýip, Hajymyrat Hudaýgulyýew sözüni jemledi we şu günki günde maglumatlaryň täze energiýadygyny, batyrgaý tehnologik çözgütleriň bolsa durnukly ösüşiň kepilididini nygtady.Çykyşynyň ahyrynda ministr halkara hyzmatdaşlaryny şu ýylyň noýabr aýynda Aşgabatda geçiriljek sebitiň iň iri tehnologik sergisi bolan «Türkmentel – 2026» atly forumyň çäklerinde dialogy dowam etdirmäge çagyrdy.Türkmen-hytaý işewürler forumy we onuň bilen ugurdaş geçirilýän sergi 28-30-njy aprel aralygynda Aşgabatda, Söwda-senagat edarasynyň binasynda geçirilýär. Bu giň gerimli çäre Hytaý Halk Respublikasynyň 200-den gowrak döwlet we hususy işewürler düzümleriniň wekillerini, şol sanda “CNPC”, “Sany Heavy Industry”, “Sinotruk” we “Nuctech” ýaly ägirt uly kompaniýalary bir ýere jemledi. Ara alyp maslahatlaşmalaryň merkezinde — ýangyç-energetika toplumyndaky, ulag logistikasyndaky, obasenagatdaky we sanlylaşdyrmakdaky strategik hyzmatdaşlyk durýar. Forum «Beýik Ýüpek ýoluny dikeltmek» strategiýasyny we «Bir guşak, bir ýol» başlangyjyny özara sazlaşdyrmak üçin möhüm meýdança bolup hyzmat edýär hem-de Türkmenistanyň Ýewraziýanyň esasy logistik merkezi hökmündäki ornyny berkidýär.
Azerbaýjan bilen Türkmenistanyň arasynda ulag we telekommunikasiýa meseleleri ara alnyp maslahatlaşyldy
Türkmenistanyň Ministrler Kabinetiniň Başlygynyň orunbasary Batyr Annayew Azerbaýjan Respublikasynyň Türkmenistandaky Adatdan daşary we Doly ygtyýarly ilçisi Gismat Gozalowy kabul etdi. Bu barada Azerbaýjanyň Türkmenistandaky Ilçihanasy Turkmenportala habar berdi.Taraplar Azerbaýjan bilen Türkmenistanyň arasynda ýokary derejeli syýasy dialogyň hem-de özara saparlaryň ikitaraplaýyn gatnaşyklaryň ösüşine goşýan goşandyny belläp, iki ýurduň ýolbaşçylarynyň syýasy erkiniň netijesinde hyzmatdaşlygyň strategik derejä ýetendigini nygtadylar.Duşuşykda ýurtlarymyzyň arasynda ulag, şeýle hem tranzit, logistika, sanly ösüş we telekommunikasiýa ugurlarynda häzirki ýagdaý we geljekki mümkinçilikler ara alnyp maslahatlaşyldy.Iki ýurduň amatly geografik ýerleşişiniň we sebitde artýan tranzit mümkinçiliginiň ulag geçelgelerini giňeltmek üçin möhüm mümkinçilikleri döredýändigi bellenildi.Şeýle hem, Bilelikdäki Hökümetara Toparynyň işleriniň çarçuwasynda sanly ösüş, telekommunikasiýa infrastrukturyny kämilleşdirmek, ulag-logistika we tranzit aragatnaşyklaryny berkitmek boýunça täze mümkinçilikler göz öňünde tutuldy. Şol bir wagtyň özünde, Azerbaýjan bilen Türkmenistanyň arasynda strategik hyzmatdaşlygyň we doganlyk gatnaşyklaryň, esesan hem agzalan ugurlarda amaly hyzmatdaşlygyň has-da giňeldilmegine özara gyzyklanma bildirildi.
Türkmenistan Hytaý bilen bilelikde ýokary tehnologiýalar pudagyny ösdürmäge taýýardyr
Türkmenistan ýokary tehnologiýalar ulgamynda, şol sanda emeli aň ugrunda ylmy-barlag merkezlerini döretmek we bilelikdäki taslamalary durmuşa geçirmek boýunça Hytaý bilen hyzmatdaşlygy giňeltmäge gyzyklanma bildirýär. Bu barada Türkmenistanyň aragatnaşyk ministri Hajymyrat Hudaýgulyýew Aşgabatda geçirilen Türkmen-hytaý forumyndaky çykyşynda aýtdy.«Türkmenistanyň Aragatnaşyk ministrligi ýokary tehnologiýalar ulgamynda Hytaý Halk Respublikasy bilen hyzmatdaşlygy giňeltmäge ileri tutulýan ugur hökmünde garaýar. Hytaýyň öňdebaryjy tejribesiniň we Türkmenistanyň ösüşiniň strategiki ugurlarynyň utgaşmagy bilelikdäki taslamalary durmuşa geçirmek üçin giň mümkinçilikleri açýar» — diýip, ministr belledi.Onuň sözlerine görä, Türkmenistan üçin emeli aň infrastruktura derejesinde strategiki ugur bolup durýar. Ol dolandyryşyň netijeliligini ýokarlandyrmagyň, hyzmatlary şahsylaşdyrmagyň we täze ykdysady mümkinçilikleri açmagyň möhüm guraly hökmünde ösdürilýär.Hudaýgulyýewiň bellemegine görä, ýurt neýro-ulgamlaryň tehnologiýalar ulgamynda giň gerimli taslamalary durmuşa geçirýär. Olar akylly ulgamlary döretmäge we öz-özüni öwrenýän algoritmleri ösdürmäge gönükdirilendir. Bu işläp taýýarlamalar döwlet dolandyryşy, lukmançylyk, bilim we ykdysadyýetiň beýleki möhüm pudaklarynda netijeli çözgütleriň esasyny düzýär.Ministr Türkmenistanyň Hytaý bilen bilelikde emeli aň boýunça ylmy-barlag merkezlerini döretmäge, neýro-torlar tehnologiýalar ulgamynda taslamalary amala aşyrmaga, zatlaryň interneti çözgütlerini we «akylly şäherler» konsepsiýasyny ornaşdyrmaga, şeýle hem kwant tehnologiýalary boýunça hyzmatdaşlygy ösdürmäge taýýardygyny nygtady.«Bu hyzmatdaşlyk diňe bir ykdysady peýda getirmek bilen çäklenmän, eýsem bilimleriň, tejribäniň we tehnologiýalaryň alyş-çalşygy arkaly uzak möhletleýin ösüşi hem üpjün eder» — diýip, Hudaýgulyýew sözüni jemledi.
Türkmenistanyň Prezidenti sanly ulgam arkaly iş maslahatyny geçirdi
Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we welaýatlarda alnyp barylýan işler bilen baglanyşykly meselelere garaldy.Ilki bilen, Ahal welaýatynyň häkimi T.Nurmyradowa söz berildi. Ol welaýatda dowam edýän möwsümleýin oba hojalyk işleri barada hasabat berdi.Bellenilişi ýaly, häzirki wagtda bugdaý ekilen meýdanlarda agrotehnikanyň kadalaryna laýyklykda ideg etmek, ösüş suwuny tutmak işleri alnyp barylýar. Galla kabul ediş kärhanalaryny, elewatorlary, kombaýnlary we beýleki tehnikalary galla oragy möwsümine taýýarlamak babatda zerur işler ýerine ýetirilýär. Gowaça ekilen meýdanlarda gögeriş suwuny tutmak, gögeriş alnan meýdanlarda hatarara bejergi, ýekelemek, otag etmek işleri geçirilýär. Pile möwsüminiň çäklerinde ýüpekçi kärendeçiler tarapyndan ýüpek gurçuklaryna ideg etmek işleri alnyp barylýar. Şeýle hem häkim ýurdumyzy durmuş-ykdysady taýdan ösdürmek boýunça maksatnamalara laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.Döwlet Baştutanymyz hasabaty diňläp, gowaça we bugdaýa ideg işleriniň talabalaýyk geçirilmegini ileri tutulýan wezipeleriň hatarynda belledi hem-de häkime degişli tabşyryklary berdi. Şunuň bilen birlikde, hormatly Prezidentimiz welaýatda şu ýyl açylyp ulanmaga berilmegi meýilleşdirilýän dürli maksatly desgalardaky gurluşyk işleriniň ýokary hilli, öz wagtynda ýerine ýetirilmegini gözegçilikde saklamagy tabşyrdy.Balkan welaýatynyň häkimi H.Aşyrmyradow welaýatda dowam edýän oba hojalyk işleri barada hasabat berdi.Bellenilişi ýaly, şu günler welaýatyň bugdaý ekilen meýdanlarynda ideg etmek, ösüş suwuny tutmak işleri dowam edýär. Galla oragy möwsümine guramaçylykly girişmek maksady bilen, kombaýnlary, bugdaý daşajak awtoulaglary, galla kabul ediş nokatlaryny taýýar etmek babatda zerur çäreler görülýär. Gowaça ekişi dowam edip, möwsümi bellenen möhletlerde tamamlamak üçin degişli işler alnyp barylýar. Ekiş geçirilen ýerlerde gögeriş suwy tutulyp, gögeriş alnan meýdanlarda bolsa hatarara bejergi, ýekelemek, otag etmek işleri ýerine ýetirilýär. Pile möwsüminiň çäklerinde pileçi kärendeçiler tarapyndan ýüpek gurçuklaryna ideg etmek işleri geçirilýär. Şeýle-de häkim ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş we önümçilik maksatly desgalardaky gurluşyk işleriniň barşy barada hasabat berdi.Hormatly Prezidentimiz hasabaty diňläp, oba hojalygynda dowam edýän jogapkärli möwsümiň talabalaýyk, agrotehniki möhletlerde geçirilmeginiň toplumlaýyn çemeleşmäni talap edýändigini belledi we häkime birnäçe tabşyryklary berdi. Döwlet Baştutanymyz şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň ýokary hilli, öz wagtynda ýerine ýetirilmegini gözegçilikde saklamagy tabşyrdy.Daşoguz welaýatynyň häkimi D.Babaýew welaýatdaky möwsümleýin oba hojalyk işleri barada hasabat berdi.Bellenilişi ýaly, şu ýyl sebitde bugdaýyň bol hasylyny ösdürip ýetişdirmek üçin ak ekin meýdanlarynda agrotehnikanyň kadalaryna laýyklykda mineral dökünler bilen iýmitlendirmek, ösüş suwuny tutmak işleri alnyp barylýar. Galla kabul ediş kärhanalaryny we elewatorlary galla oragy möwsümine taýýar etmek babatda zerur çäreler görülýär. Welaýatda gowaça ekişi dowam edip, gögeriş alnan meýdanlarda hatarara bejergi işleri geçirilýär. Şunda oba hojalyk tehnikalary doly güýjünde işledilýär. Pileçi kärendeçiler tarapyndan ýüpek gurçugyna ideg etmek işleri dowam edýär. Şeýle hem ýurdumyzy durmuş-ykdysady taýdan ösdürmek boýunça maksatnamalara laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalarda gurluşyk işleriniň barşy barada hasabat berildi.Hormatly Prezidentimiz hasabaty diňläp, oba hojalyk pudagynyň öňünde durýan möhüm wezipelere ünsi çekdi we gowaça ekişini agrotehniki möhletlerde tamamlamak, bugdaýa ideg işlerini talabalaýyk alyp barmak üçin zerur çäreleri görmegi tabşyrdy. Mundan başga-da, döwlet Baştutanymyz şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamak babatda tabşyryklary berdi.Lebap welaýatynyň häkimi D.Genjiýew welaýatda dowam edýän möwsümleýin oba hojalyk işleri barada hasabat berdi.Bellenilişi ýaly, häzirki wagtda welaýatyň bugdaý ekilen meýdanlarynda ösüş suwy tutulýar. Galla oragy möwsümine taýýarlyk görmegiň çäklerinde galla kabul ediş kärhanalaryny, elewatorlary, degişli tehnikalary möwsüme taýýarlamak babatda zerur işler geçirilýär. Welaýatda gowaça ekişi dowam edip, bu jogapkärli möwsümi agrotehniki möhletlerde tamamlamak üçin zerur çäreler görülýär. Ekiş geçirilen meýdanlarda gögeriş suwuny tutmak, gögeriş alnan ýerlerde bolsa hatarara bejergi, ýekelemek, otag etmek işleri alnyp barylýar. Sebitde pile öndürmek möwsümi guramaçylykly dowam edýär. Şeýle-de häkim şu ýyl welaýatda açylyp ulanmaga berilmegi meýilleşdirilýän dürli maksatly desgalardaky gurluşyk işleriniň barşy barada hasabat berdi.Hormatly Prezidentimiz hasabaty diňläp, oba hojalyk önümçiliginde ylmy taýdan esaslandyrylan agrotehniki kadalaryň berk berjaý edilmeginiň, tehniki we beýleki serişdeleriň netijeli ulanylmagynyň ekinlerden bol hasyl almagyň önümçilikde ýokary görkezijileri gazanmagyň esasy şerti bolup durýandygyny aýtdy hem-de häkime birnäçe anyk görkezmeleri berdi. Döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalaryň çäklerinde welaýatda şu ýyl üçin meýilleşdirilen işleriň bellenen möhletlerde ýerine ýetirilmegini gözegçilikde saklamagy tabşyrdy.Mary welaýatynyň häkimi D.Annaberdiýew welaýatda möwsümleýin oba hojalyk işleriniň barşy barada hasabat berdi.Nygtalyşy ýaly, häzirki wagtda bugdaý ekilen meýdanlarda agrotehnikanyň kadalaryna laýyklykda suw tutmak, mineral dökünler bilen iýmitlendirmek işleri ýerine ýetirilýär. Galla kabul ediş kärhanalaryny, elewatorlary, däne ýygýan kombaýnlary, beýleki tehnikalary galla oragy möwsümine taýýar etmek boýunça degişli işler alnyp barylýar. Welaýatyň ekerançylyk meýdanlarynda gowaça ekişi dowam edip, gögeriş alnan ýerlerde hatarara bejergi, ýekelemek we otag etmek işleri geçirilýär. Şunda oba hojalyk tehnikalaryndan netijeli peýdalanylýar. Welaýatda ýüpek gurçugyna ideg etmek işleri dowam edip, bu ugurda pileçi kärendeçilere degişli ýardamlar berilýär. Mundan başga-da, häkim Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleri barada hasabat berdi.Hormatly Prezidentimiz hasabaty diňläp, oba hojalyk ekinlerinden ýokary hasyl almak üçin ekerançylykda agrotehnikanyň kadalarynyň berk berjaý edilmeginiň zerurdygyny belledi hem-de häkime degişli tabşyryklary berdi. Şeýle-de döwlet Baştutanymyz şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalygynda dowam edýän möwsümleýin işler barada hasabat berdi.Bellenilişi ýaly, häzirki wagtda welaýatlaryň bugdaý ekilen meýdanlarynda agrotehnikanyň kadalaryna laýyklykda ideg etmek, hususan-da, mineral dökünler bilen iýmitlendirmek, ösüş suwuny tutmak işleri alnyp barylýar. Galla oragy möwsümine taýýarlykly girişmek, daýhan yhlasy bilen ýetişdirilen bugdaý hasylyny öz wagtynda ýygnap almak maksady bilen, galla kabul ediş kärhanalaryny, elewatorlary, kombaýnlary, beýleki tehnikalary möwsüme doly taýýar etmek babatda zerur çäreler görülýär. Ýurdumyzda gowaça ekişi dowam edip, ekiş geçirilen meýdanlarda gögeriş suwuny tutmak, gögeriş alnan ýerlerde hatarara bejergi, ýekelemek we otag etmek işleri geçirilýär. Welaýatlarda pile möwsüminiň çäklerinde ýüpek gurçuklaryna ideg etmek işleri dowam edýär.Hormatly Prezidentimiz hasabaty diňläp, oba hojalyk pudagynyň milli ykdysadyýetimizdäki möhüm ornuna ünsi çekdi hem-de ýurdumyzda azyk bolçulygyny mundan beýläk-de pugtalandyrmak boýunça pudagyň öňünde durýan wezipeleriň üstünlikli ýerine ýetirilmeginiň zerur talap bolup durýandygyny belläp, wise-premýere bu ugurda alnyp barylýan işleri gözegçilikde saklamagy tabşyrdy.Soňra döwlet Baştutanymyz iş maslahatyna gatnaşyjylara ýüzlenip, möwsümleýin oba hojalyk işlerine ýene-de bir gezek ünsi çekdi we gowaça ekişini agrotehniki möhletlerde tamamlamagyň, bugdaýa ideg işleriniň ylmy taýdan esaslandyrylan kadalara laýyklykda ýerine ýetirilmeginiň, galla oragyna guramaçylykly taýýarlyk görmegiň zerurdygyny nygtady hem-de bu babatda degişli tabşyryklary berdi.Hormatly Prezidentimiz Serdar Berdimuhamedow sanly ulgam arkaly geçirilen iş maslahatyny jemläp, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.
Pudagara elektron maglumat alyş-çalyş ulgamynyň resminama binýady döredildi
Döwlet baştutanymyzyň parasatly ýolbaşçylygynda Türkmenistanyň Aragatnaşyk ministrligi telekommunikasiýa ulgamyny kämilleşdirmäge, sanly hyzmatlary ösdürmäge we döwletimiziň tehnologik garaşsyzlygyny ýokarlandyrmaga gönükdirilen giň gerimli maksatnamalary durmuşa geçirýär. Ýurdumyzda sanly tehnologiýalaryň gurluşy, maddy-tehniki we hukuk binýady döwrüň talaplaryna laýyklykda kämilleşdirilýär, ylmy-tehniki özgertmeler hem-de iri taslamalar durmuşa geçirilýär.Şonuň bilen baglylykda, köpugurly sanly gurşawy döretmegiň çäklerinde Türkmenistanda Pudagara elektron maglumat alyş-çalyş ulgamynda elektron resminamalary pudagara alyşmak hakynda Birkysmy ylalaşyk we Pudagara elektron maglumat alyş-çalyş ulgamynyň operatory bilen Pudagara elektron maglumat alyş-çalyş ulgamynyň gatnaşyjysynyň arasyndaky Birkysmy şertnama tassyklandy.Bu resminamalar Pudagara elektron maglumat alyş-çalyş ulgamynyň hereket etmeginiň tertibiniň talaplaryny, şeýle hem bu ulgam arkaly elektron resminamalary pudagara alyşmagyň, şol sanda elektron döwlet hyzmatlary ýerine ýetirilende döwlet edaralarynyň maglumat ulgamlarynyň arasynda resminama we maglumat alyşmalaryny amala aşyrmagyň umumy ýörelgelerini kesgitleýär. Resminamalarda olary baglaşýan taraplaryň borçlary, hukuklary, jogapkärçilikleri we özara maglumat alyşmagyň düzgünleri beýan edilýär. Pudagara elektron maglumat alyş-çalyş ulgamynyň operatory hökmünde Türkmenistanyň Aragatnaşyk ministrliginiň garamagyndaky «Türkmentelekom» elektrik aragatnaşyk kompaniýasy çykyş edýär. Operator kiberhowpsuzlyk babatynda töwekgelçilikleri ýüze çykarmak we yzygiderli gözegçilik etmek, ulgama gatnaşyjylaryň işini utgaşdyrmak ýaly wezipeleri ýerine ýetirýär. Bu ulgam ähli döwlet edaralarynyň awtomatlaşdyrylan elektron maglumatlar binýadynyň ýeke-täk ulgama birikdirilmegini we bitewi maglumat giňişliginiň kemala gelmegini üpjün edýär. Öňdengörüjilikli, parasatly başlangyçlary bilen döwletimizi dünýäniň innowasion ösen ýurtlarynyň hataryna goşmaga giň ýol açyp berýän, Türkmen Halkynyň Milli Lideri, Gahryman Arkadagymyza hem-de Hormatly Prezidentimiz, Arkadagly Gahryman Serdarymyza köp sag bolsun aýdýarys!Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli, döwlet ähmiýetli tutýan tutumly işleri elmydama rowaç alsyn!
Aragatnaşyk ministrliginiň Politehniki orta hünär okuw mekdebinde wagyz-nesihat çäresi geçirildi
«Garaşsyz, baky Bitarap Türkmenistan — bedew batly at-myradyň mekany» ýylynda ýurdumyzda sportuň we sagdynlygyň aýyna bagyşlanyp geçirilýän çäreleriň çäklerinde, Türkmenistanyň Aragatnaşyk ministrliginiň Politehniki orta hünär okuw mekdebi bilen Türkmenistanyň jemgyýetçilik guramalarynyň bilelikde gurnamagynda «Saglygym - baş baýlygym» atly wagyz-nesihat çäresi geçirildi.Wagyz-nesihat çäresine Politehniki orta hünär okuw mekdebiniň mugallymlarydyr, talyp ýaşlary, şeýle hem, Türkmenistanyň jemgyýetçilik guramalarynyň wekilleri gatnaşdylar.Çärede çykyş edenler «Hormatly Prezidentimiziň pähim- paýhasy bilen ýurdumyzda Türkmenistan döwletimizi sagdynlygyň we ruhubelentligiň ýurduna öwürmek, bedenterbiýäni we sporty hil taýdan täze basgançaklara çykarmak, sporty wagyz etmek sagdyn durmuş ýörelgelerini has-da dabaralandyrýar» diýip belläp geçdiler.Talyp ýaşlar bolsa, öz çykyşlarynda ýurdumyzyň ähli bilim ojaklary bilen bir hatarda, Politehniki orta hünär okuw mekdebinde geçirilýän sport çärelerine, ýaryşlara, baglary idetmek, arassaçylyk düzgünlerini berjaý etmek ýaly ýowar işlerine işjeň gatnaşyp, ýurdumyzyň abadançylygy we mundan beýläk-de gülläp ösmegi ugrunda bilimlerini has-da kämilleşdirip, yhlasly zähmet çekjekdiklerine ynandyrdylar.Çärä gatnaşyjylar türkmen döwletini bagtyýarlyga alyp barýan Gahryman Arkadagymyza hem-de Arkadagly Gahryman Serdarymyza sport bilen meşgullanmaga döredilýän ähli mümkinçilikleri üçin alkyş sözlerini beýan etdiler.